कांग्रेस कम्यूनिष्ट पार्टी जस्तो क्याडर बेस होइन । अधिवेशनमा जित्ने भन्दा हार्नेहरु धैरै हुन्छन्, ती पराजितहरुले चुनावमा  सहयोग गर्देनन्, भोट हाल्दैदन् ।’

सङुलोन्यूज
काठमाडौं, २३ कात्तिक ।
नेपाली कांग्रेस महाधिवेशन सरकारले निर्धारण गरेको फागुन २१ अघि वा त्यसपछि भन्ने विवादमा रुमल्लिइ रहेको बेला कानूनविदहरुले भने मध्यमार्गी बाटो अख्तियार गर्न सुझाएका छन् ।
कांग्रेस कार्यवाहक सभापति पूर्णबहादुर खडकाले शनिबार अपराह्न पार्टीमा चलिरहेको गतिरोधबारे कानूनविदहरुसँग सल्लाह गरेका थिए । छलफलमा वरिष्ठ अधिवक्ता शेर बहादुर केसी, वरिष्ठ अधिवक्ता गोपालकृष्ण  धिमिरे, वरिष्ठ अधिवक्ता खम्ब बहादुर खाती र अधिवक्ता लक्ष्मी रावल सहभागि थिए ।
केसीले आफूहरुले पार्टीको विधानमा टेकेर सबैलाई समेटने गरी मध्यमार्गी बाटो अख्तियार गर्न सुझाएको बताए । ‘हामीलाई विधान, कानून अनुसार कसरी जान सकिन्छ भनेर बोलाउनु भएको थियो’ केसीले भने ‘हामीले सबैलाई मिलाएर, परिवर्तनको सन्देश जाने, देखिएका विवाद पनि समाधान हुने किसिमले अगाडि बढ्न सुझाव दियौं ।’
‘महामन्त्रीको एउटा लाइन छ, सहमहामन्त्रीको अर्को लाइन छ’ केसी भन्छन ‘आआफ्नो स्वार्थ हेरेर हुँदैन । कांग्रेस मिल्नुको विकल्प छैन ।’
तपाईहरुले सुझाएको मध्यमार्ग कस्तो हो ? भन्ने प्रश्नमा केसी भन्छन् ‘ हामीले यसै गर भनेका छैनौं, मिलाएर लैजानुस भनेका छौं । कांग्रेस एकजुट भएर गएन भने नेपालबाट डेमोक्रेसी जान्छ, त्यसमा शंका छैन ।’

नेपालको राजनीतिलाई मार्गदर्शन गर्दे आएको पार्टी हो कांग्रेस, तर अहिले व्यक्ति केन्द्रीत, स्वार्थ केन्द्रीत कुरा सतहमा आएका छन्

चुनाव अघि वा पछि कहिले महाधिवेशन कहिले गर्न सुझाव दिनुभयो ? भन्ने प्रश्नमा केसीले घुमाउरो उत्तर दिए । केसीले भने ‘कांग्रेस कम्यूनिष्ट पार्टी जस्तो क्याडर बेस होइन । अधिवेशनमा जित्ने भन्दा हार्नेहरु धैरै हुन्छन्, ती पराजितहरुले चुनावमा सहयोग गर्देनन्, भोट हाल्दैदन् ।’
छलफलमा सहभागी अधिवक्ता लक्ष्मी रावलले कांग्रेस बैंठक निरन्तर चलिरहेको सन्दर्भमा कार्यवाहक सभापति खडकाले सल्लाह मागेको बताउँदै भनिन् ‘ हामीले विधान अनुसार के कसरी जान सकिन्छ, सबै पक्षलाई मिलाएर अगाडि बढ्न सुझायौं ।’
छलफलमा विशेष अधिवेशनको बारे चर्चा भएको बताउँदै रावलले भनिन् ‘ विधानमा विशेष अधिवेशन के का लागि भन्ने स्पष्ट छैन, विधानको थप नियमावलीमा हुनुपर्ने, त्यो पनि छैन, विशेश अधिवेशनको कार्यविधिनै छैन ।’
‘नेपालको राजनीतिलाई मार्गदर्शन गर्दे आएको पार्टी  हो कांग्रेस, तर अहिले व्यक्ति केन्द्रीत, स्वार्थ केन्द्रीत कुरा सतहमा आएका छन्’ रावल भन्छिन ‘सबै जिम्मेवारहरुले स्वार्थ भन्दा माथी उठेर निर्णय लिनुपर्ने बेला छ । हामिले कार्यवाहक सभापतिलाई सबैलाई समेटेर अगाडि बढ्न सुझायौं ।’