झुकाउने

सङ्लोन्यूज

काठमाडौं, २२ कात्तिक ।

नेपाली कांग्रेसको शनिबार बसेको केन्द्रीय समितिको आकस्मिक बैंठकले कांग्रेसका पूर्व केन्द्रीय सदस्य। पूर्व मन्त्री एंव, रौटहट जिल्ला सभापति मोहम्मद अफताव आलमको  निधनमा शोक प्रस्ताव पारित गरेको छ । पार्टीका कार्यवाहक सभापति पूर्ण बहादुर खडकालको सभापतित्वमा बसेको बैंठकले  आलमको सम्मानमा कात्तिक २३ गते कांग्रेसका सबै तहका पार्टी कार्यालय बन्द गर्ने, कात्तिक २२ देखी २४ सम्म तीन दिन पार्टीको झण्डा आधा झुकाउने लगायतका निर्णय गरेको छ ।

वम विस्फोट भएपछि घाइते व्यक्तिहरुलाई ईटा भट्टामा हालेर जलाएको आरोपमा विवादास्पद आलमलाई २०८२ जेठ १४ गते  वीरगंज उच्च अदालतले सफाई दिएपछि उनी जेल मुक्त भएका थिए । वीरगंज अदालतले जिल्ला अदालत रौतहटको आजिवन काराबासको फैसला उल्टाउँदै उनलाई सफाई दिएको हो ।

२७ चैत २०६४ मा भएको घटनाको १२ वर्ष पछि सुरु भएको न्यायीक प्रक्रियाबीच आलमलाई जिल्ला अदालत रौटहटले २०७६ कात्तिक देखी पूर्पक्षका लाथि थुनामा पठाएको थियो भने २०८१ चैतमा जन्मकैंदको फैसला गरेको थियो ।

आलम केही महिना देखी बिरामी भएर अस्पतालमा उपचाररत थिए । काठमाडौं स्थित सिनामंगल मेडिकल अस्पतालमा शुक्रबार राती उनको निधन भएको हो । न्यायीक प्रश्न जेल मुक्त अवस्थामा पनि प्रश्नहरु उठिरहेको अवस्थामा आलमको निधन भएको छ ।

कांग्रेसको शोक प्रस्ताव

(१) नेपाली कांग्रेसका पूर्व केन्द्रीय सदस्य, पूर्व मन्त्री एवं रौतहट जिल्लाका पूर्व सभापति  ६३ वर्षीय मोहम्मद आफ्ताव आलमको गए राति काठमाडौको सिनामंगल स्थित काठमाडौं मेडिकल कलेजमा उपचारका क्रममा भएको निधनप्रति कार्यसमितिको यो बैठक गहिरो दुःख व्यक्त

गर्दछ ।

(२) वि.सं. २०१९ असार ५ गते रौतहटको राजपुर फरहदवा गा.वि.स. वडा नं. ४ मा जन्मनु भएका आलमले वि.सं. २०३६ सालदेखि नेपाल विद्यार्थी संघबाट राजनीतिक यात्रा प्रारम्भ गर्नु भएको थियो । राजनीतिक जीवनमा उहाँले पटक–पटक मन्त्री पदको जिम्मेवारी सम्हाल्नु भएको थियो । वि.सं. २०५३ को उपनिर्वाचन, २०५६ को आम निर्वाचन, २०६४ को संविधानसभाको निर्वाचन र २०७४ को प्रतिनिधि सभा निर्वाचनमा रौतहट क्षेत्र नं. २ बाट उहाँ विजयी हुनु भएको थियो । वि.सं. २०६७ मा सम्पन्न पार्टीको बाह्रौं महाधिवेशनमा उहाँ नेपाली कांग्रेसको केन्द्रीय सदस्य पदमा निर्वाचित हुनु भएको थियो ।

नेपालमा लोकतन्त्र स्थापना र पुनस्र्थापनाका आन्दोलनहरू र संघर्षका क्रममा उहाँले पटक–पटक जेल जीवन व्यतित गर्नुका साथै स्वर्गीय आलमले पार्टीको विभिन्न पदीय जिम्मेवारीमा रहेर नेपाली कांग्रेसको संगठन निर्माण र नेपालको लोकतान्त्रिक आन्दोलनहरूमा नेतृत्वदायी भूमिका निर्वाह गर्नु भएको थियो ।

(३) उहाँको निधनबाट पार्टीले एक अनुभवी नेतृत्वलाई गुमाएको छ । उहाँको आत्माको चिर शान्तिको कामना गर्दै केन्द्रीय कार्यसमितिको यो बैठक एक मिनेट मौन धारण गर्ने निर्णय गर्दछ । दुःखको यस घडीमा शोक सन्तप्त परिवारजन र आफन्तजनप्रति यो बैठक गहिरो समवेदना प्रकट गर्दछ ।

(४) उहाँप्रति उच्च सम्मान प्रकट गर्दै शोक कार्यक्रम देहाय बमोजिम निर्धारण गरिएको छ—

(क) २०८२ कात्र्तिक २२, २३ र २४ गते (तीन दिनसम्म) पार्टीको केन्द्रीय कार्यालय, प्रदेश कार्यालय र जिल्ला कार्यालहरूमा झण्डा आधा झुकाउने ।

(ख) २०८२ कात्र्तिक २३ गते केन्द्र, प्रदेश र जिल्लाका सबै कार्यालय बन्द गर्ने ।

तस्बिर :सामाजिक संजाल