सङ्लोन्यूज
काठमाडौं, २० कात्तिक ।
नेपाली कांग्रेस सूर्यविनायक नगर समितिले एमालेका पोलिटब्यूरो सदस्य महेश बस्नेतलाई संयमित भएर कदम चाल्न चेतावनी दिएको छ । हालैमात्र महेश बस्नेतले कांग्रेस नगर समितिका एक सदस्यलाई लिएर फेसबुकबाट धम्की दिएको सन्दर्भमा नगर समितिले विज्ञप्ती जारी गर्दे यस्तो चेतावनी दिएको हो ।
बस्नेतको फेसबुकमा विहिबार आएको पोष्ट प्रति हाम्रो ध्यानाकर्षण भएको उल्लेख गर्दे नगर कार्यसमितिका सचिवद्धय सुमन न्यौपाने र विश्वराम थापाले बिहिबार विज्ञप्ती जारी गरेका हुन् । विज्ञप्तीमा भनिएको छ ‘नेपाली कांग्रेस सूर्य विनायक नगर कार्यसमिति आफ्ना निर्दोष साथीहरु माथी गरिएको र गरिने सबैखाले आक्रमणको सामना गर्ने छ ।’ कांग्रेसले त्यस्तो परिस्थिति सृजना नगर्न समेत सबैमा आग्रह समेत गरेको छ ।
भदौ २३,२४ को आन्दोलनको क्रममा भएका तोडफोड, आगजनीमा सूर्यनिवायक नगर समितिका कुनै सदस्यहरु संलग्न नरहेको स्पष्ट गर्दे विज्ञप्तीमा त्यस्तो विध्वंशमा कोही कसैको संलग्नता देखिए कारबाही गर्न पछि नपर्ने विज्ञप्तीमा बताइएको छ । विज्ञप्तीमा भनिएको छ ‘नेपाली कांग्रेसका साथीहरु लक्षित गरी राजनीतिक आग्रह, पूर्वाग्रह राखी निर्दोष कुनै पनि साथी माथी कपोकल्पित लान्छना लगाई आरोप लगाउने, तर्साउने, धम्क्याउने र नेपाली कांग्रेस आवद्ध पार्टीका साथीहरुको चरित्र हत्या गरी मनोबल गिराउने कार्यहरु क्षम्य हुन सक्तैन ।’
एमाले अध्यक्ष केपि शर्मा ओली सूर्यविनायक नगरपालिका ७, गुण्डुमा बसोबास गर्न थालेपछि यस क्षेत्र संवेदशशील मानिएको छ । गुण्डु क्षेत्रमा ओलीको सुरक्षाको नाममा एमालेका कार्यकर्ताहरुको बाक्लो उपस्थिति रहने गरेको र हिडडुलमा समेत कडा निगरानी, सोधपुछ गर्ने गरिएको स्थानीय बताउँछन् ।