गलत सूचना वा विवरण पेश गरी सहुलियतपूर्ण स्वास्थ्य उपचार सुविधा, आवास सुविधा, परिवार सहायता, शैक्षिक सहायता जस्ता कुनै पनि सुविधा, सहायता नलिन आग्रह

काठमाडौ, १६ माघ।
नेपाल स्थित अमेरिकी राजदूताबासले अमेरिकामा रहेका नेपालीका लागि अन्यन्त जरुरी सुचना भन्दै अमेरिकी पासपोर्टको दुरुपयोग नगर्न आग्रह गरेको छ । सामाजिक संजाल फेसबुकमा राखिएको सूचनामा अमेरिकन नागरिकका लागि निर्घारित गरिएको सेवा सुबिधा प्रयोगमा नेपालीहरुहरु ठूलो संख्यामा रहेको अध्ययनबाट थाहा भएको जनाउँदै त्यस्ता सुविधा वा सहायतामा निर्भर नहुन भनिएको छ ।
सूचनामा भनिएको छ ‘अध्ययन, भ्रमण, रोजगारी, व्यवसाय तथा परिवार वा आफन्त भेटघाट इत्यादिको सिलसिलामा संयुक्त राज्य अमेरिकामा रहेको कुनै विदेशी नागरिक अमेरिकामा रहँदा अवैधानिक तवरले वा गलत सूचना वा विवरण पेश गरी अमेरिकी सरकारले आफ्ना नागरिकहरूका लागि उपलब्ध गराउने गरेको सहुलियतपूर्ण स्वास्थ्य उपचार सुविधा, आवास सुविधा, परिवार सहायता, शैक्षिक सहायता जस्ता कुनैपनि सुविधा वा सहायता माथि निर्भर भए गरेको पाइएमा त्यस्तो कार्यमा संलग्न व्यक्तिको भिसा वा ग्रिनकार्ड स्टाटसमा सोझै असर पर्ने र रद्ध समेत हुने जानकारी सम्बन्धित अमेरिकी अधिकारीहरूबाट प्राप्त भएको छ ।’

सूचनामा विभिन्न प्रयोजनमा अमेरिका गएका नेपालीहरूमध्ये सन् २०२४ मा गएकाहरूको तथ्याङ्कले मात्रै पनि नेपाली नागरिकहरू अमेरिकी सरकारका सहुलियतपूर्ण सेवा लिनेहरूको माथिल्लो सूचीमा रहे पाइएकोले नेपालीका लागि हाललाई आप्रवासी भिसा बन्द गरेको जनाइएको छ । माथिल्लो सूचीमा भनिएपनि संख्यात्मक विवरण भने दिइएको छैन ।
यसै गरी बी१ बी२ भिसामा अमेरिका गएका नेपालीहरू अमेरिकामा ओभरस्टे गरेको र रोजगारी लगायत तोकिएको भन्दा फरक काममा संलग्न भएको पाइएको आधारमा अमेरिकी सरकारले २१ जनवरी देखि लागू हुने गरी बी१ बी२ भिसा आवेदनमा अमेरिकी डलर ५००० देखी १५००० सम्म धरौटी भिसा बोण्ड राख्‍नुपर्ने प्रावधान लागू गरेको छ।
‘यस्ता कार्यले नेपालप्रति अमेरिकी सरकारको भिसा नीति थप प्रभावित हुनसक्ने हुँदा भविष्यमा अमेरिका जान चाहने नेपाली नागरिकलाई अमेरिकी भिसा प्राप्ति अझ कठीन हुन जाने र मुलुकको प्रतिष्ठामा गम्भीर नकारात्मक असर पर्न जान्छ’ सूचनामा भनिएको छ ‘विभिन्न उदेश्यले संयुक्त राज्य अमेरिकामा रहनुभएका नेपाली नागरिकहरूले संयुक्त राज्य अमेरिकामा रहँदा गैरकानूनी तवरले वा गलत सूचना वा विवरण पेश गरी सहुलियतपूर्ण स्वास्थ्य उपचार सुविधा, आवास सुविधा, परिवार सहायता, शैक्षिक सहायता जस्ता कुनै पनि सुविधा, सहायता माथि निर्भर नहुन, नगराउनुहुन, साथै बी१ बी२ भिसाको दुरुपयोग नगर्नुहुन सम्बन्धित सबैमा हार्दिक अनुरोध गरिन्छ।’

तस्बिर : सामजिक संजाल