काठमार्डौं, ६ मंसिर ।
नेपाली कांग्रेसले महिना दिन लामो केन्द्रीय समितिको बैंठकको निर्णय शनिबार सार्वजनिक गर्दे फागुन २१ को निर्वाचनमा भाग लिने औपचारिक घोषणा गरेको छ । आन्तरिक छलफलका लागि भन्दै पटकपकट स्थगित हुँदै शनिबार बसेको बैंठकले पार्टी पङ्तीमा घनिभूतरुपमा उठेको महाधिवेशन, विशेष महाधिवेशनबारे केही बोलेको छैन, एक किसिमको मौनता देखिन्छ ।वर्तमान कार्यसमितिको चार वर्षे कार्यकाल पुरा भएकोले नियमित महाधिवेशन गर्नुपर्ने वैधानिक वाध्यता एकातिर छ भने अर्कोतिर चुनाव अगाडि पार्टी नेतृत्व परिवर्तन गर्नुपर्दछ भन्दै महाधिवेशन प्रतिनिधिहरुले बोलाएको विशेष महाधिवेशनलाई सम्बोधन गर्नुपर्ने स्थितिमा छ कांग्रेस यतिखेर ।
मंसिर ११ को केन्द्रीय समितिको बैंठकले महाधिवेशन वा विशेष महाधिवेशनबारे कुनै ठोस निर्णय गर्ने हो ?  सप्तरीबाट कांग्रेस महासमिति सदस्य रंजित कर्णसँग सोधिएको प्रश्नमा उनी भन्छन् ‘अब महाधिवेशनहरुको नाममा अल्झिने होइन, चुनावमा होमिनुपर्ने बेला हो ।’सङ्लोन्यूजले कांग्रेसले अब के गर्नुपर्दछ ? भन्ने प्रश्नमा नेपाल विद्यार्थी सघका पूर्व अध्यक्ष, संविधानसभा सदस्य महाधिवेशन प्रतिनिधि रंजित कर्णको प्रेसक्रिप्सन उनकै शब्दमा :
मेरो आफ्नो विचारमा नेपाली कांग्रेसको वर्तमान नेतृत्व अनिर्णयको बन्दी बनेको छ । कुनै पनि निर्णय गर्न सकिरहेको छैन । यसले आफ्नो असफलता प्रर्र्दशन गरिसकेको छ । केन्द्रीय नेतृत्वमा सबै पदाधिकारी पर्दछन् । एक महिना लामो छलफल पछि पनि महाधिवेशनबारे कुनै निर्णय आएन । केन्द्रीय समिति निर्णयकासाथ अगाडि आउँनु पर्दथ्यो, त्यो भएन । यो भनेको नेतृत्वको अकर्मण्यताको पराकाष्ठा हो । यसमा महामन्त्रीजीहरुको पनि दोष छ । उहाँहरुले एजेण्डा उठाउनुभयो, त्यसको समाधान दिनसक्नु भएन । चुनावमा नउठने जस्ता बचकना कुराहरु आउँन थालेका छन् ।
हामी देखिरहेका छौं, एमाले एकढिक्का भएको छ । चुनावमा लागि सकेको छ, एमाले । माओवादी लगायतका वामपन्थीदलहरु आपसमा मिलेर चुनावमा होमिएका छन् । मधेशवादीदलहरुमा मोर्चाबन्दी सुरु भएको छ । कांग्रेस आपसमा अलमलिएको देखिदैंछ । अब, नियमित महाधिवेशनको मिति घोषणा हुनुपर्दछ । चुनाव अगाडि महाधिवेशन संभव छैन । चुनाव पछि महाधिवेशनको तिथि तोकिनुपर्दछ । अब, यताउता लाग्ने समय छैन, चुनावमा होमिनु पर्ने बेला हो । माघमा राष्ट्रियसभा चुनाव छ। १९ जना सभासद चुन्ने चुनाव हो, त्यो, त्यसमा पनि लाग्नुपर्यो । फागुनमा चुनाव हुने हुँदा माघ २० सम्ममा उम्मेदवारी पनि टुंगो लाग्नु पर्दछ, उम्मेदबारी दिनुपर्दछ । अबको समय भनेको निर्वाचनमा होमिने समय हो । गाउँगाँउमा जनताको माझमा जानुपर्ने बेला हो । सबैजना अब चुनावमा लाग्नु पर्दछ ।
विशेष महाधिवेशन पार्टीको आन्तरिक कुरा हो । पार्टीलाई क्षति हुनेगरी विशेष महाधिवेशन गरेर कसैलाई लाभ हुँदैन । विशेष अधिवेशनको मागलाई मिलाउनु पर्दछ । विधानबाट प्राप्त अधिकारको कुरा जहाँसम्म छ, त्यसमा बहस आवश्यक छ । विधान पनि पार्टीकै लागि हो । पार्र्टीको हितमा विधानको प्रयोग हुनुपर्दछ । विद्यानले पार्टीलाई क्षती हुनु भएन ।
कांग्रेसमा पक्ष पक्षमा आआफ्ना कुरा हुने गरेको देखिन्छ । छलफलबाट निकास निकाल्ने प्रयास आवश्यक छ । त्यस्तो प्रयासमा हामीहरु पनि लागेका छौं ।
महाधिवेशन तिथि मिति सहीत देशभर कसरी कांग्रेसको सम्पूर्ण शक्ति होमिनु पर्र्दछ, चुनावमा खनिनु पर्दछ । अब त्यता लागौं ।

तस्बिर :रंजितको फेसबुकबाट