भक्तपुर, २४ कात्तिक ।

जनआन्दोलन २०४६ का कमाण्डर एवं नेपालको सामाजिक राजनीतिक जीवनमा लौंहपुरुष भनेर परिचित गणेशमान सिंहको १११ औं जन्मजयन्ती सोमबार एक कार्यक्रमकाबीच गणेशमान सिंह स्मृतिवाटिका भक्तपुरमा मनाइएको छ ।

सूर्यविनायक नगरपालिका वडा नं ५ स्थित गणेशमान सिंह स्मृतिवाटिमा रहेको सिंहको पूर्ण कदको शालिकमा माल्यार्पण तथा पुष्प अर्पण गर्दे सिंहको राजनीतिक योगदानको चर्चा गरियो । कार्यक्रम वाटिका तथा नेपाली कांग्रेस भक्तपुरको आयोजनामा सम्पन्न भएको हो ।

कार्यक्रममा बोल्दै कांग्रेस भक्तपुरका सभापति एंव भक्तपुर २ का निवर्तमान सांसद दुर्लभ थापाले गणेशमान सिंहको लोकतन्त्र प्रतिको निष्ठा, त्याग, समर्पणलाई सबै नेपालीले आत्मसात गर्नुपर्ने धारणा राखे ।

कार्यक्रमलाई सम्बोधन गर्दे थापाले भने ‘अहिलेका परिवर्तनकारी जेनजिहरुले पनि गणेशमान सिंहको योगदानको अध्ययन गर्न आवश्यक छ । गणेशमान सिंहले गरेको योगदानलाई बिर्सन मिल्दैन ।’ नेपालमा प्रजातन्त्र स्थापना गर्न सात दशकसम्म निरन्तर लागेका गणेशमान सिंहको निवास आगजनि र तोडफोड भएकोमा थापाले दुःख व्यक्त गरे ।

कार्याक्रम आयोजनाको संयोजन कांग्रेस भक्तपुरका सदस्य कबिर राणाले गरेका थिए । कार्र्यक्रम राणाको सभापतित्वमा संचालन भएको थियो ।

काठमाडौँ, २४ कात्तिक स् विसं २०४६ को जनआन्दोलनका सर्वोच्च कमाण्डर गणेशमान सिंहको १११औँ जन्मजयन्ती आज विभिन्न कार्यक्रम आयोजना गरी मनाइँदै छ ।

गणेशमान सिहं फाउन्डेसनद्वारा सोमबार शोभाभगवतीमा स्व। गणेशमान सिहंको १११औँ जन्मजयन्तीको अवसरमा आयोजित कार्यक्रममा स्व। सिह सालिकमा माल्यणपण गर्दै उहाँका छोरा तथा  पूर्व उप्रधानमन्त्री एवं कांग्रेस नेता प्रकाशमान सिंह  । तस्बिर :हरिराम भेटुवाल /रासस

नेपाली राजनीतिमा त्याग र साहसको उदाहरणका रुपमा रहनुभएका सिंह सबैको निष्ठाको केन्द्र बन्न सफल हुनुभएको थियो । विसं २०४६ को जनआन्दोलन सफल भएपछि तत्कालीन राजा वीरेन्द्रले प्रधानमन्त्री बन्न गर्नुभएको प्रस्तावमा उहाँले आफ्ना समकक्षी नेता कृष्णप्रसाद भट्टराईलाई अघि सार्दै नेपाली राजनीतिमा त्यागको उच्च नमूना प्रस्तुत गर्नुभएको थियो ।

विसं १९७२ कात्तिक २४ गते काठमाडौँको क्षेत्रपाटीमा जन्मनुभएका नेता सिंहको विसं २०५४ असोज २ गते निधन भएको हो । काठमाडौँको खानदानी परिवारमा जन्मनुभएका सिंहले विसं १९९७ मा स्थापना भएको नेपालको पहिलो राजनीतिक दल प्रजा परिषद्को सदस्य भई राणा शासन हटाउने अभियानमा आफूलाई सक्रिय बनाउनुभएको थियो ।

राणा शासन अन्त्य गर्ने अभियानमा लागेपछि उहाँलगायत नेतालाई तत्कालीन सरकारले जेल हाल्यो । विसं २००७ अघि भद्रगोल जेल फोरेर भाग्न सफल हुनुभएका गणेशमान प्रवास जानुअघि तत्कालीन राणा हटाऊ आन्दोलनमा सक्रिय हुनुभएको थियो । जेलबाट भागेर भारतमा पुगी अर्का नेता बिपी कोइरालासँग राजनीतिक सम्बन्ध विकसित गर्नुभयो । केही सहयोगीका साथ विसं २००३ मा स्थापित नेपाली राष्ट्रिय कांग्रेसलाई आजीवन जुझारु नेतृत्व दिन गणेशमानको उल्लेखनीय भूमिका छ ।

प्रजातन्त्र स्थापनाका लागि भएको विसं २००७ को क्रान्तिका एक अगुवाका रुपमा उहाँले वीरगञ्ज मोर्चामा सशस्त्र सङ्घर्ष गर्नुभयो । देशमा प्रजातन्त्र बहाली र पुनर्बहालीका लागि समर्पित सिंह सैद्धान्तिक रुपमा बिपीका अनुयायी र सबैभन्दा ठूला समर्थकका रुपमा रहनुभयो । नेपाली कांग्रेसलाई लोकप्रिय बनाउन सदा क्रियाशील हुनुभयो ।

विसं २०१५ मा पहिलो निर्वाचन भएपछि बनेको सरकारमा वरिष्ठ मन्त्री हुनुभएका गणेशमानले विसं २०१७ मा प्रजातन्त्र अपहरण भएपछि आठ वर्ष निरन्तर पहिले सिंहदरबार र त्यसपछि सुन्दरीजल बन्दी गृहमा कारावास जीवन बिताउनुभयो । विसं २०२५ मा बिपीसँगै सुन्दरीजल बन्दी गृहबाट रिहा भएपछि प्रवासमा राजनीतिक सङ्गठन विस्तार गर्नुभयो । २०३३ सालमा बिपीसँगै राष्टिूय एकता तथा मेलमिलापको नीति लिई स्वदेश फर्केर तत्कालीन पञ्चायती व्यवस्थाका विरुद्ध सक्रिय रहनुभयो ।

तत्कालीन पञ्चायती सरकारले बिपीसँगै मृत्युदण्डको माग गरिएका आठ वटा मुद्दामा विशेष अदालतबाट सफाइ पाउनुभयो । गणेशमानले विसं २०३६ को विद्यार्थी आन्दोलन र जनमत सङ्ग्रहमा उत्तिकै नेतृत्वदायी भूमिका निर्वाह गर्नुभयो । बिपीको निधनपछि कांग्रेसका सर्वोच्च नेताका रुपमा गणेशमानले विसं २०४२ को सत्याग्रह आन्दोलनको नेतृत्व गर्नुभयो । विसं १९९७ देखि अनवरत राजनीतिमा समर्पित कडा स्वभाव र जुझारु व्यक्तित्वका सर्वप्रिय नेता गणेशमानको महत्वपूर्ण योगदान विसं २०४६ मा रह्यो । जनआन्दोलनका लागि कम्युनिष्टसँग मिलेर पञ्चायत विरुद्ध आन्दोलनको घोषणा गर्ने गणेशमान सिंह उक्त आन्दोलनका सर्वोच्च कमाण्डर भई सबैको प्रिय बन्नुभएको हो ।

नेता सिंहलाई विसं २०१७ पुस १ गतेको कूपछि विसं २०२५ सम्म बिपी कोइरालासँगै सुन्दरीजल बन्दीगृहमा थुनिएको थियो । विसं २०२५ मा जेलमुक्त भएपछि बिपीसँगै भारत निर्वासनमा जानुभएका नेताहरुलाई विसं २०३३ पुस १६ गते राष्ट्रिय एकता तथा मेलमिलापको नीति लिएर नेपाल फर्किएपछि त्रिभुवन अन्तरराष्ट्रिय विमानस्थलबाटै गिरफ्तार गरी सुन्दरीजल बन्दीगृहमा दोस्रोपटक थुनियो ।

विसं २०६१ भदौ २४ गते बन्दीगृहलाई बिपी सङ्ग्रहालयमा रुपान्तरण गरिएको थियो । गणेशमान जयन्तीका अवसरमा नेपाली कांग्रेस र यसका भ्रातृ एवं शुभेच्छुक सङ्घ संस्थाले आज विभिन्न कार्यक्रम आयोजना गरी मनाउने जनाइएको छ ।